Ragam panggilan uda dalam dialek minang


Biasonyo, kalau kito basuo jo urang nan labiah tuo, koknyo laki-laki baimbaukan “uda”, nan padusi “uni”. Namun, jikok kito pai ka Padang, tampek asa muasa “Sandard Baku Baso Minang”, di siko imbauan uda tu saketek batuka manjadi “udo” . Jadi kok lah batuka daerahnyo, lain pulo imbauannyo. Di bawah ko, ambo sampaikan babagai-bagai contohnyo.

Dari Padang kito bajalan ka Piaman, di siko uda tu baganti jadi “ajo” dan kalau kito sampai di Padang Panjang urang-urang di siko, ba-“etek” ka udanyo dan ka adiak amainyo “etek” pulo samo jo balaku umum (Standard Baku Baso Minang)., tagantuang jo sia inyo mangecek. Kalau Tek Mukhtar , pastilah kakaknyo laki-laki dan kalau “Tek Zahara”, pastilah amai keteknyo. Tapi, ado pulo panggilan uda tu manjadi “uwan”/”tuan”.

Kito taruih ka Luhak Agam sabalah ka Gunuang Singgalang, di Balingka, Ampek Koto, uda baimbaukan “ambo”. Uda ambo labiah lamak baimbaukan “ambo den”. Dari siko kito bagageh arah ka Gunuang Marapi (Agam Selatan), kito sampai di Banuhampu, di siko uda baraliah manjadi “tuan”, uda ambo manjadi “tuan den”. Sudah tu, taruih ka ateh kito sampai di Sungai Pua, uda disabuik urang di siko jo “atiak” (“t” nyo agak badatuih). Uda ambo labiah lamak baimbaukan “atiak denai”.

Dari Agam kito manurun ka Luhak “50 Koto”, kito sampai di “Payokumbuah”, pek iko, eh maaf di siko uda disabuik urang jo “tuen” / “wen” (“e” dalam ember). Di siko uda ambo labiah lamak disabuik “tuen den”. Namun, kalau kito baraliah ka sabalah Utara Payokumbuah / Mudiak , contohnyo di Kubang jo sakuliliangnyo uda disabuik urang jo “tuan”. Uda ambo labiah lamak diimbaukan urang di siko jo “tuan den”. Tapi kalau kito taruih ka Utara, di kawasan Koto Tinggi, Baruah Gunuang jo sakuliliangnyo, uda diimbaukan urang jo “uwan”, uda ambo manjadi “uwan den”.Namun “uwan’ iko hanyo balaku untuak dunsanaknyo sajo. Kalau bukan dunsanaknyo diimbaukannyo jo “mak”( Si Rustam manjadi “mak Rustam”, tapi bukan “mamak Rustam”). Jadi panggilan “mak” iko samo jo panggilan “mas” untuak urang lain di Jawa. Dari siko kito bajalan arah ka Timur, kok lah sampai di Pangkalan Koto Baru panggilan uda ko, iyo bana lain, di siko uda baimbaukan “ombak”. Kalau ado ombak di Batang Maek, urang-urang di siko manyabuiknyo “galombang”. Uda ambo di siko baimbaukan “ombak deyen” ( aden manjadi “deyen”). Di Pangkalan Koto Baru ko, panggilan abang untuak nan labiah tuo dipakai juo, tapi jaan sumbarang urang diimbau jo abang. Sabab, di siko abang hanyolah dipakai untuak suami kakak Kalau bukan kakak ipa, pasti inyo manjawek : Bilo lo “deyen” kawin jo kakak ang.Dari Pangkalan Koto Baru ko kito taruih bajalan ka arah Timur-Lauik,malewati bateh antaro Kab. 50 Kota jo Kab. Kampar, sahinggo sampai di Bangkinang. Walau kito barado di lain provinsi, namun kito masih di Luhak 50 Koto / Ranah Minang (Catatan Penulis :Kab. 50 Kota indak samo do jo Luhak 50 Koto), di siko urang manyabuik udanyo jo “oncu”.

Urang Aie Bangih, di Utara Ranah Minang lain pulo adaiknyo panggilan kakak jo uda kaduonyo dipakai, tagantuang faktor dominan apo di kakaknyo. Jikok warano kuliknyo nan dominan baimbaukan “kak” sarato warano kuliknyo, contohnyo : “kak utiah, kak itam dlsb.”. Jikok bantuak badannyo nan dominan baimbaukan “uda”, contohnyo : “uda gopuak, uda ketek dlsb. “

Dari sabalah Utara “Ranah Minang”, kito pai ka sabalah Selatan, Urang Solok, Talawi dan lain-lainnyo ba-“kakak” ka udanyo dan ka uni-nyo bakakak juo. Dan dari siko kito taruih ka Sijunjuang dan sakuliliangnyo uda baimbaukan “aciak/ociak”, di tampek-tampek lain “aciak” baarati “amai ketek”. Akia carito, kito sampai di Silungkang, urang-urang di siko maimbau udanyo jo “datuak’.

Pajalanan kito taanti tantang itu, andai salah tolong pelok’i, nyampang ado nan lain tolong tambahkan.

dikutip: forumminang.com

One thought on “Ragam panggilan uda dalam dialek minang

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s